Affascinu e Cuntraffascinu - Comune di Crucoli

Emanuele di Bartolo
dal libro "U jusciarulu" (1962)

Comu. na serpa mpasturavacca,
subba nu. lettu, cota a cuddrura,
mò grida e strepita, mò si langura,
d'u malu 'e stomacu. Strìncia e si ntacca,

ccu 'ri dui mani conzati a granca,
vestiti e carni, nn'unica prisa;
pò s'abbílìscia, si stenna tisa,
tutt'affilata nt'a faccia janca.

Màmmìsa para comu storduta:
nun sa cchi dirí, nun sa cchi fari!
Sunu d'accordu, mmeci, 'i cummari:
Lisa, 'a magara, vó 'd avertuta,

pecchì è sicuru. c'a giuvaneddra
- Jesu cca sia! - l'anu adocchjata
e de l'affàscinu vò liberata
subitu subitu, 'a povareddra!

E Lisa vena: tutta cumpunta
li pipitìa, seria, nt'i ricchj...
strica 'ra trippa. ccu ruta e spicchj
d'agghju e 'ra licca ' mmenz'a 'ra frunta...

Nt'a sacca funna va cerca e scava
na petra 'e salu, nu Crucifissu...
Macchì! 'u doluru resta 'ru stissu,
anzi cchjuttostu para ca ngrava!

E Lisa parta ccu na buttigghja
d'ogghju lampantu... nu menzu chilu
i e cafè... zzùccaru... Pilu sumpilu
si nni sta jennu ntantu ssa figghja

e... Un' ti scordari mai, Carupita,
tènilu a mente ssu sei d'agustu !

Atru ca Lisa!... Si, giustu giustu,
nun t'operavi 'e appennicita !?!

E puru màmmita chi fa 'ra sperta
d'u cuntraffàscinu, ciota! si fida?!...
" A preggiudizzi no ca cci crida...
ma... è sempi bonu na porta aperta!... "

Strf. 5 v. 2: pipitia = bisbiglia.